Pilar Blanco anuncia que presentará unha moción alegando investimentos para Marín

Esta mañá o deputado do BNG no Parlamento Galego, Bieito Lobeira, acompañado da portavoz municipal, Pilar Blanco e o responsable local Celso Milleiro, compareceron en rolda de prensa para valorar os orzamentos que a Xunta de Galiza ven de presentar en forma de proxecto.
Bieito Lobeira cualificou os orzamentos de miserables con respecto á comarca do Morrazo, e especialmente a Marín. Esta localidade recibe un total de 91.196, 60 € en concepto de protección do patrimonio natural e de reparacións no Centro de Servizos Sociais.
Segundo Bieito Lobeira estes orzamentos condenan a Marín a seguir no ascenso das cifras de parados, xa que non hai política de emprego e a parálise total con respecto a áreas como sanidade, deporte, ensino ou infraestruturas.
Pola súa banda a portavoz municipal Pilar Blanco destacou que os orzamentos superan negativamente aos do ano anterior, xa que por riba de non contemplar novos investimentos, elimina os poucos que aparecían nos orzamentos para o ano 2011.
“A escasa partida de 600.000 €, non utilizada, que os orzamentos do 2011 recollían para a construción do Centro de Saúde, desaparece. Isto quere dicir que non haberá Centro de Saúde en Marín no ano 2012. Ademais a memoria dos orzamentos deixa patente que o financiamento de centros sanitarios farase mediante formulas de pago adiado (cofinanciamento público-privado), e entre os centros a construír non aparece ningún no Morrazo, e por suposto o de Marín tampouco”, afirma a portavoz do BNG.
Pilar Blanco tamén destacou que desaparece a partida para o soterramento da Avenida de Ourense, e amosouse especialmente preocupada pola ausencia dunha partida específica para o Convenio de Saneamento nas parroquias asinado polo anterior goberno municipal. “Moito nos tememos que se paralicen os proxectos non licitados ate o momento e non se faga o tanque de tormenta que aliviaría os problemas de desbordamentos no centro urbano”, asegura Pilar Blanco.
Pilar Blanco lembrou que os orzamento non contemplan ningún investimento nos centros de estudo marinenses. “Obras prometidas polo PP como a reparación do pavillón da Laxe, ou as melloras básicas do Colexio Carballal non se farán. Todo o anunciado en campaña electoral pola señora Ramallo queda agora en nada. Os únicos investimentos que haberá en Marín durante o 2012 son os conseguidos polo goberno anterior, que como se está a comprobar nin sequera saben xestionar (obras Arela mobilidade).
A portavoz municipal do BNG adiantou que presentará unha moción que recollerá os investimentos prioritarios en Marín non recollidos nos orzamentos da Xunta, e que espera que sexa aprobada en beneficio de tod@s os marinenses.

Marín, 21 de outubro de 2011

O BNG está preocupado polo desleixo do Partido Popular ao ter paralizadas as obras do Centro de Acollida de Visitantes aos petróglifos de Mogor.

Bieito Lobeira solicitou no Parlamento Galego á Consellaría de Cultura e Turismo unha resposta ante esta situación de abandono e desconsideración do noso Patrimonio.

Podes ollar a iniciativa premendo en: Petróglifos de Mogor

Bieito Lobeira interésase polas medidas a tomar polo futuro de Factoria Naval.

Podes ollar a interpelación realizada polo deputado do BNG premendo: Factoria Naval

O BNG pide medidas á Consellaría de Educación pola lamentábel situación do pavillón deportivo do CEIP da Laxe.

Os deputados Bieito Lobeira e Carmen Adán presentaron no rexistro do Parlamento Galego a seguinte iniciativa: Pavillón deportivo CEIP da Laxe

O BNG levou ao Parlamento o uso de hervicidas nas estradas PO-551 e PO-313.

Podes ollar a pregunta realizada perante a Mesa do Parlamento: Hervicidas

A deputado do BNG presenta varias iniciativas na Cámara galega, ao fin de esclarecer os tempos de resposta do servizos de ambulancias pertencente ao 061 no Concello de Marín e as consecuencias que se puideran derivar nos retrasos dos mesmos

Santiago de Compostela, 23 de setembro, 2011. O deputado do BNG, Bieito Lobeira rexistrou diversas iniciativas relativas á información sobre os tempos de resposta ás emerxencias das ambulancias do 061 no Concello de Marín ante o recorte deste servizo, por parte da Consellaría de Sanidade.
O deputado do BNG alude á denuncia pública da Confederación Intersindical Galega (CIG) sobre a tardanza nos tempos de resposta deste servizo, retrasos na asistencia de emerxencias graves (por infarto) como aconteceron os días 31 de agosto e 18 de setembro resultando falecidas as tres persoas atendidas, salienta o parlamentario.
Para o nacionalista “a irresponsable” decisión da Consellaría de Sanidade e da Fundación Pública 061 está a provocar graves retrasos nun servizo “básico” e imprescindible por seren eliminada a actividade dunha ambulancia asistencial en Marín en horario nocturno de 22 horas da noite a 10 hs do día seguinte o que obriga, afirma Lobeira, a que as emerxencias sexan atendidas polas ambulancias localizadas en Pontevedra.
O deputado pregunta ao Goberno galego polos datos que manexa a Consellaría de Sanidade na activación de ambulancias para acceder á asistencia de emerxencias en Marín, os días 31 de agosto e 13 e 18 de setembro do 2011, cales foron os momentos de notificación das emerxencias e a posterior mobilización de ambulancias.

PREGUNTAS PRESENTADAS POLO BNG NO PARLAMENTO GALEGO: Ambulabcia Pregunta_parlamentaria[1], Ambulancia Documentación_2ª[1], Ambulancia Petición_documentación[1]

O BNG esixe a eliminación de verteduras no mar procedente do dragado do Porto de Marín moi perto da Illa de Ons que forma parte do Parque Natural das Illas Atlánticas. Este material afecta ademais aos bancos marisqueiros, caladoiros pesqueiros, polígonos bateeiros, así como ao ecosistema da zona.

Xa está ben que desde algunhas institucións administrativas teñan no mar un luga onde botar o lixo en vez de buscar lugares axeitados en terra.

Podes ollar a iniciativa que presentou o BNG premendo Verteduras na mar

O BNG DENUNCIA O “SILENZO CÓMPLICE” DA XUNTA PERANTE A PROPOSTA DE INTEGRAR O PORTO DE MARÍN EN VIGO

Bieito Lobeira insta ao Goberno da adoptar medidas concretas para defender un proxecto de futuro para Marín, que aproveite todas as súas potencialidades

Santiago de Compostela, 3 Xuño 2011.- O deputado do G.P do BNG Bieito Lobeira ven de denunciar o “silenzo cómplice” do goberno do PP perante as declaracións do presidente de Portos do Estado nas que abría a porta de forma “indisimulada” á integración do porto de Marín en Vigo.

Bieito Lobeira rexistrou unha serie de iniciativas parlamentares reclamando da Xunta que poña en marcha medidas concretas para defender un proxecto de futuro para o dito porto, de tal xeito que non perda a súa categoría.

O deputado nacionalista lembra que malia depender competencialmente de Madrid, a Xunta ten marxe de maniobra, pois o presidente da autoridade portuaria de Marín foi designado polo goberno galego, que á súa vez nomea a catro representantes no seu consello de administración.

Non obstante, segundo Lobeira a dependencia da política portuaria definida dende Madrid pexa no desenvolvemento de Marín, pois malia o seu dinamismo e medre –só no ano 2009 pasaron por este porto 1.641.928 toneladas- o Goberno do Estado nunca apostou por Marín.

“Os dados están á vista –engade- e tamén os investimentos e prioridades: as grandes apostas políticas do estado español en materia portuaria foron e son, con toda claridade, Barcelona, Valencia, Xixón, Alxeciras, As Palmas e Bibao, o porto de Marín recibe un trato orzamentario marxinal, de apenas o 0,5 por cento do investimento en relación co resto de portos de interese xeral”.

Para Lobeira, o porto de Marín ten potencialidade, tamén no ámbito pesqueiro, polo que debe deixar de ser considerado como mero negocio rendíbel para as arcas do Estado e converterse en motor socioecónomico e xerador de emprego digno en toda a comarca, en todo o referido ao tránsito e actividade marítima, na súa vertente pesqueira, comercial e de servizos.

“Cómpre, para iso, garantir a titularidade galega e o seu carácter público e, desde logo, unha outra actitude, máis activa, con iniciativa, na defensa deste porto por parte da Xunta”, conclúe o deputado.

Iniciativa do BNG: Porto de Marín e de Vigo

O BNG CONSTATA, TRALA RESPOSTA DO DIRECTOR XERAL DE INDUSTRIA, QUE O MORRAZO PODE REXISTRAR MÁIS APAGÓNS ELÉCTRICOS COMO OS DO MES DE DECEMBRO

Bieito Lobeira formulou unha pregunta sobre a orixe das deficiencias na subministración eléctrica que afectou a máis de 35.000 usuarios da comarca do Morrazo e a contía económica derivada das perdas e danos producidos

Santiago de Compostela, 24 de decembro de 2010. O deputado do BNG, Bieito Lobeira formulou hoxe, no transcurso da Comisión de Industria celebrada no parlamento galego, unha pregunta ao Goberno sobre unha avaría e posterior incendio na subestación eléctrica da Magdalena en Cangas, que provocou un prolongado cese da subministración eléctrica doméstica e industrial afectando, segundo a propia empresa FENOSA, a 35.000 usuarios.
Este corte de enerxía eléctrica afectou en grande medidas ás localidades de: Tirán, Coiro, Beluso, Cela, Ardán e Seixo, Cangas e Moaña.
Na súa intervención, o parlamentario nacionalista explicou que, en menos de 24 horas, o 5 de decembro, producíase un segundo apagón trala avaría da subestación de Lourizán afectando durante horas os lugares de: Marín, Bueu, Seixo, Ardán, Cela e Pardavila, así como a outros núcleos rurais de Cela e Bueu.
FENOSA e administración galega únicas responsabeis
O parlamentario nacionalista achacou a responsabilidade do acontecido á empresa subministradora “FENOSA-GAS NATURAL” e considerou que non é de recibo que esta gran empresa que xerou 1.300 millóns de euros de beneficios no ano 2010 “permita unha situación no Morrazo” como a que se describiu.
Asemade, o deputado responsabilizou tamén á Consellaría de Economía e Industria por non garantir o subministro eléctrico axeitado á poboación ao que está obrigada.
Importantes perdas económicas que seguen sen cuantificar
Para Lobeira, os apagóns eléctricos produciron importantes prexuízos económicos aos titulares de numerosos establecementos comerciais e sectores industrias e considerou que a administración galega debe garantir que feitos desta gravidade non se volvan repetir.
Sen embargo, trala resposta do Director xeral de Industria, Enerxía e Minas, Angel Bernardo Tahoces, o deputado do BNG concluíu que estes apagóns poden volver a producirse porque a administración “abdicou das súas responsabilidades” e a día de hoxe aínda non están cuantificados os danos producidos polo corte de enerxía prolongado na comarca do Morrazo.
Inacción de Industria ante os apagóns
Lobeira acusou á Consellaría de Industria de ser “mera espectadora” ante o acontecido, non ter cuantificado os danos, non aportar medidas contra futuros apagóns e non informar, no seu momento, das reclamacións ás que tiñan dereito os afectados.
Finalmente, o parlamentario do BNG afirmou que a empresa responsable dos apagóns e a administración deben facerse cargo das perdas económicas ocasionadas.

O BNG puxo de exemplos os problemas ocasionados nas Pedreiras, As Estivadas e en San Xián afectadas polas escorrentías da construción da Variante de Marín pola Xunta de Galiza, ademais do desaloxamento da Residencia de Marín, o desbordamento do río Loira…así como tamén o acontecido no resto da nosa comarca.

Desde o BNG solicitamos información ao respecto: avaliacións, cuantificacións dos danos, responsabilidades e actuacións a realizar no futuro.

Podes ollar a iniciativa do BNG premendo aquí: Chuvas 2010