Xavier Aboi, Secretario da CIG-Mar e membro do Consello Local do BNG en Marín

Xavier Aboi:‘Eu milito na política e no fútbol de veteranos’
A crise duplicou por dous o traballo, número de afiliados e asesores da CIG en Vigo e Pontevedra, áreas nas que ten competencia Xavier Aboi. As avalanchas de despidos, EREs e demais casos de conflitividade laboral forman parte das horas de servizo deste sindicalista convencido que fala de ‘compromiso’ en lugar de horas extra.

O resto da entrevista realizada por A Nosa Terra ao compañeiro e membro do Consello Local do BNG premendo AQUÍ

“VALORACIÓN DUN ANO DE GOBERNO DA XUNTA DE GALIZA”

A chegada ao poder do Partido Popular á Xunta de Galiza traeu consego unha rebaixa dos dereitos sociais adquiridos nos últimos tempos. En vez de construir, adicáronse neste último ano a desfacer todo o habido e por haber, tendo como obxectivo principal favorecer intereses espúreos e achegados ao círculo do Partido Popular.
Imos lembrar os casos máis importante e sangantes:

- A anulación da gratuidade dos libros de textos.
- Normas do Habitat, concedéndolle permisos aos concellos para autorizar excepcións. O que é unha cesión ás presións exercidas por certos promotores.
- Suspensión do Decreto Eólico, paralisando este sector emerxente da economía galega, para favorecer ás empresas non galegas.
- Derogación do Decreto do Galego aprobado e consensuado por todas as forzas políticas con representación no Parlamento de Galiza e disminuindo considerabelmente as partidas dedicadas á normalización lingüística, nin Fraga se atreveu a tanto. Sen lugar a dúbidas amosan unha galegofobia que nunca antes se mirara no Partido Popular.
- Apoio á privatización da Sanidade, como no caso do Hospital que queren construir en Monte Carrasco (Pontevedra) e ademais disminuindo os recortes orzamentarios.
- Escasa atención a outro servizo social como é a educación, favorecendo o ensino privado.

O PP continúa coa política de desmantelamento dos avanzos logrados polo BNG durante o Bipartito, prexudicando gravemente ao País e favorecendo os seus amigos. O actual goberno da Xunta está nunha situación absoluta de parálise e de inacción, carecente de propostas que den solucións á crise que padecemos, incapaces de modificar e impulsar o modelo produtivo, de apostar polo investimento do coñecimento e de investigación, dos investimentos en pesca e no medio rural. Desde logo non cren nas potencialidades do País e só poñen nunha bandexa a Galiza para que outros e non o pobo saquen proveito. O PP deixa claro que que a súa acción de goberno basease na privatización dos servizos públicos e a desprotección dos sectores máis desfavorecidos.

No relacionado co concello son moitos os temas que quedan sen tratar:

- Centro de Saúde. Desde o Concello fixo o seu labor, púxose a dispor do Concello terreos e desde a Xunta de Galiza nen tan sequer orzamentaron esta actuación. O PP mesmo chegou a votar en contra da enmenda que o BNG levou neste sentido ao Parlamento de Galiza.
- Polígono Empresarial. Fíxose un grande esforzo e retiramos a proposta que había e buscamos o consenso entre todas as forzas políticas. Observamos a carencia de proxecto do PP cando se visualiza contradiccións internas entre as propostas da Autoridade Portuaria de Marín e alternativa dun chan industrial nos lindes entre Moaña e Marín.
Namentres os concelleiros do BNG traballan e realizan estudos de necesidade de chan empresarial en Marín e que formularemos a Xestur.
- Avenida de Ourense. Este proxecto tan necesario para a nosa vila, xa non lles vale ao PP.
- Seguranza Vial na Po-313 e Po-551. O anterior Goberno da Xunta deixou un proxecto a desenvolver mais esta paralisado e curiosamente ainda está sen retirar o Plano VIGO INTEGRA, do cal de opuxo tanto o PP.
- Proxecto Saneamento Integral nas parroquias de Marín. Este Plano tan importante para conseguir unha maior calidade de vida para os veciños e veciñas do rural marinense atópase co agochamento por parte do PP. A Concellaría de Medio Ambiente de Marín cumpriu con todos os requisitos que se lle encomendou mais durante este tempo non recibimos resposta desta Xunta do PP. Por qué non recibe o Conselleiro de Medio ambiente aos representantes municipais (Alcalde e Concelleira)? Por qué non fan caso a este proxecto cando mesmo está refrendado pola Portavoz Municipal do PP? Cal é o compromiso? Outro caso onde visualizamos a verdadeira faciana do Grupo Municipal do PP.
Esgotada xa a vía “diplomática”, buscarase outras vías para que este proxecto tan prioritario socialmente se leve a cabo.
- Vivendas Públicas no Carballal. O estado de abandono do lugar é importante, mais está cada vez máis claro que a demanda de vivenda pública e de servizos sociais non ten importancia para o PP.

O PP de Marín só busca os votos, só existe a veciñanza cando hai eleccións máis non respectan ao povo de Marín. Durante este tempo non se plasmou na realidade do municipio os proxectos que desde o Concello de Marín se lle formulou á Xunta. Namentres outros concellos de Galiza benefícianse, aquí o PP cala e otorga.
O BNG demanda que a Xunta reciba aos representantes do Concello de Marín porque nin co Bipartito nin co Goberno de Fraga temos padecido semellante aldraxe.

En Marín, a 15 de Marzo do 2010.

Asdo: O Responsábel Local e o Grupo Municipal do BNG en Marín

Desde o BNG queremos felicitar e amosar o noso apoio á recén creada Plataforma «Queremos Galego» en Marín.
Damos a nosa benvida a este colectivo cultural e animamos á sociedade marinense concienciada de protexer, defender, dinamizar e espallar a nosa lingua para que se una a esta plataforma cidadá, pois o galego é patrimonio de todos e todas nós.
QUEREMOS GALEGO é unha plataforma cidadá, conformada por entidades de diferentes ámbitos (asociacións culturais, sociedade educativa, sindicais, políticas…) e por persoas a título individual, que nace da vontade de articular unha ampla resposta colectiva a prol da lingua propia do noso pobo, o galego; de defensa e afirmación dos usos públicos e dereitos lingüísticos xa garantidos pola actual lexislación; de progresiva normalización naqueles espazos onde o idioma de noso non goza aínda da presenza desexada.

Ligazóns: A Nosa Terra, QGM (Facebook), Xornal de Galicia, Chuza!, La Voz de Galicia

O Concello de Marín ven de recibir o Plan de Ordenación do Litoral elaborado pola Xunta de Galiza actualmente en mans do PP. A continuación ábrese un período de consultas durante o cal o Concello poderá presentar as alegacións que consideres pertinentes.

Este Plan, que en principio nace para protexer a costa, na realidade non ten en conta o PXOM e limita gravemente o crecemento de Marín.

Desde a Concellaría de Urbanismo, dirixida polo nacionalista Xosé María Vilaboa, vense de facer un primeiro analisis sobre a afección deste plan no noso termo municipal.

O POL chega a afectar unha franxa de 3 quilómetros ata o interior de Marín, de xeito que, por exemplo, chega ate a Cruz de Rolan en Pastoriza (Ardán ).
A Xunta de Galiza non tendo en conta a realidade delimita unha franxa chamada de Mellora ambiental e paisaxística que deixa afectadas e en situación de inseguridade xurídica a milleiros de vivendas e empresas o longo da nosa costa.

Este Plan do litoral tampouco respecta a ordenación urbanística recollida no PXOM. Por exemplo, mentres no PXOM zonas como a de Mogor aparecen clasificadas como urbanas, de aprobarse o Plan proposto polo PP tería que ser clasificadas como rústicas, o mesmo ocorre coa zona de Seixo.
Outra das consecuencias sería a imposibilidade de crecemento do solo urbano de Marín, xa que delimita un corredor ecolóxico no lugar da Laxe e clasifica como bosque a protexer unha ampla zona de Raposeiras. Hai que recordar que estas zonas son vitais para posibilitar o crecemento de Marín tal como recolle o PXOM.

Outra das preocupacións que manifesta o Edil de Urbanismo e situación de precariedade na que quedarían moitas das empresas afectadas por este Plan do Litoral.

Este Plan imposibilitaría tamén poder dotar na zona de Seixo de dotacións tan importantes como un campo de fútbol ou o pavillón polideportivo, xa os terreos quedan dentro de un corredor ecolóxico.

Finamente, o edil nacionalista manifesta a súa preocupación pola posible aprobación dun Plan do Litoral elaborado sen ter en conta en absoluto o traballo realizado desde o Concello, e recollido no PXOM que está actualmente na xunta de Galiza para súa valoración medio ambiental, para a continuación pasar ao tramite final de aprobación definitiva. En este sentido o próximo dia 5 o Concello manterá unha reunión coa Xunta a fin de transmitirlle todas estas preocupacións.

O Concelleiro Delegado de Urbanismo

Xosé María Vilaboa Ramos

1 de marzo de 2010

Carta publicada no Diario de Pontevedra (31.01.10) na páx. 28 en «Tribuna Aberta»

O RUEIRO MARINENSE

O BNG impulsou por compromiso ético e de dignidade colectiva o cambio do rueiro marinense, até estas alturas non é de recibo que figuren nela o nome de persoeiros vinculados á ditadura, que mataron, que asesinaron, que participaron ou foron complices do réxime franquista. Atitudes do Partido Popular en Galiza como o da Coruña que se nega a condear a figura Millán Astray ou como o de Marín con Calvo Sotelo só demostran a súa incoherencia. É lamentábel e incomprensíbel que existan prazas, rúas e distincións adicadas a persoas que o desmerecen, que existan ainda persoas que poñan en dúbida istos cambios e mesmo cheguen a criticar á máis egrexia personaxe da nosa cultura nacional: Rosalía de Castro.

Desde un principio o Bloque Nacionalista Galego tivo claro que había que chegar a un consenso amplo no cambio do rueiro, por este motivo decidimos deixar varias rúas á marxe “Exército e Mariña” e “Polígono de Tiro Naval Janer” que están afectadas pois se lle concede ese nomenclator na “honra” de seren os entes básicos para o golpe de estado que se realizou en 1936. Nos plenos de cambio do rueiro profranquista atopábase o de Calvo Sotelo por ser un protomártir da causa fascista contra o réxime democrático da República. As dúas rúas anteriormente citadas eran as que considerabamos que poideran dar máis problemas polo descoñecimento xeralizado na veciñanza marinense sobre a orixe das mesmas.

O BNG non formulou sustituir a rúa de “Jaime Janer” no mesmo expedente que o nome das rúas de Bastarreche ou Salvador Moreno, senon que foi froito do consenso entre os partidos políticos de Marín con representación e do que o PP nunca quixo subirse ao carro os que decidiron cambiala por redundancia do nomenclator no rueiro de Marín. Este partido puxo obxeccións á rúa “Calvo Sotelo” cando noutros concellos non o fixo e nin abreu a boca cando a Consellaría de Educación en función da Lei eliminou hai pouco o nome de Calvo Sotelo en Marín da Escola de Educación Infantil “O Grupo”. A única intención que ten o PP é a de ser un lastre a todo o que se fai en Marín. No seu máis rancio estilo e afastado da realidade social marinense usa calquer escusa para facer política, mais algo teremos que dicir os veciños e veciñas de Marín cando eliminan dun sopetón todos os proxectos transformadores que o BNG quixo levar para Marín. Son os mesmos responsabeis da situación dos recheos do porto onde se tivese algo de dignidade a súa Portavoz Municipal debería presentar a súa demisión inmediata, os mesmos que nos orzamentos da Xunta non deixan nin un peso ao Centro de Saúde, en fin os mesmos que levaron a Marín ao ostracismo.

Defendemos desde o BNG a eliminación paulatina do rueiro franquista e militarista. Somos unha forza política pacifista e anti-imperialista e perante os defensores a ultranza da rúa “Jaime Janer” hai que lembrarlles que morreu nunha guerra na que participou entusiastamente e onde o pobo se opuxo de forma contundente, nunha guerra colonialista contra Marrocos. Lembremos a historia na súa xusta medida e non debemos ter un descoñecimento supino do acontecido en Marín, unha historia chea de destrozos como o do monte Pesqueira, o do río Lameira, desgraciada como o do Golpe de Estado de 1936, das expropiacións forzosas (ás veces a punta de pistola) de terreos veciñais para pasalos á propiedade militar ou o do inicio do peche ao mar da nosa vila…Que lle debe logo Marín a Jaime Janer? Unha persoa que se relacionou só cunha parte da sociedade do concello, a pequena e acomplexada burguesía marinense.

Ao Partido Popular pouco lle interesa Jaime Janer senon facer uso deste nome para a confrontación política. Porque a dignidade e a xustiza quédalle lonxe dabondo.

Marín ten que reeencontrarse coa súa historia e consego mesma. Figuras como a de Rosalía de Castro dignifican a unha vila como Marín. A sociolingüista, escritora e compañeira do BNG Pilar García Negro é clara sobre Rosalía de Castro que desde o españolismo negador da existencia dunha realidade nacional galega condenou a nosa literata máis importante: “Faise preciso desentreñar os motivos dunha falsa lenda que ainda hoxe en día envolve a vida e obra de Rosalía de Castro. Cumpre devolver a esta escritora, galega, á verdade da súa produción literaria, ao seu radicalismo e a súa transgresión coma muller librepensadora, poeta, novelista, ensaísta, articulista, actriz…Rosalía representa a esencia e inicio da modernidade galega, é voz e intérprete principal da historia contemporánea de Galiza, a primeira feminista do seu tempo e se cadra da Europa do século XIX. O seu feminismo non foi casual, para nada! foi froito da correlación existente entre a súa posición, filosófica, social e política.”
Celso Milleiro Sánchez, Responsábel Local do BNG

Carta publicada no Diario de Pontevedra (28.01.2010)

Parabens Marín

En relación á carta publicada neste xornal o pasado 25 de xaneiro sobre a crítica á concelleira de cultura de Marín, gostaría de subliñar o meu desacordo ao comentario aí expresado.
Como nai e veciña de Marín, fico abraiada polo posicionamento do goberno da Xunta de Galiza que debe ser o máximo valedor da nosa lingua e que está nunha dinámica paulatina de eliminación da mesma. Quero que os meus fillos teñan a posibilidade de desenvolverse na lingua dos seus antepasados e que con este decreto que nos quere meter o Partido Popular reduce o seu espazo sustencialmente. Non coincido coas declaracións de que unha concellaría de cultura non se implique na defensa do galego, lingua da cal tanto a Constitución e o Estatuto de Autonomía garanten a súa protección. Entre os que pensan que o orzamento de cultura debe ser gastado en concertos da Pantoja ou de Julio Iglesias, somos moitos os marinenses que consideramos que os nosos cartos deben ser investidos en promocionar e dignificar o idioma propio de Galiza.
Con esta carta quero manifestar o meu agradecemento á concelleira de cultura polo apoio entusiasta na defensa do galego, á plataforma Queremos Galego e á CIG pola súa labor. A esta última por poñer a disposición do pobo de Marín autobuses de balde para acudir á manifestación. Case un centenar de marinenses poideron usar estes vehículos para ir a Santiago e aínda varios centos mais de veciños de Marín asistiron por conta allea a dita manifestación e demostrar así o seu rexeitamento ao “decretazo” da Xunta. Somentes desde unha concepción de autocomplexo e autoodio do propio se pode criticar a lingua por motivos políticos. O galego é un patrimonio de todos nós.
Asdo: Lucia Santos Omil

Carta publicada no Faro de Vigo (edición Pontevedra) o 31 de Decembro do 2009

TRISTE CABODANO

O Bloque Nacionalista Galego celebra cada 17 de Agosto o “Día da Galiza Mártir”. Esta data ten un especial significado dado que representa o asesinato do senlleiro galeguista Alexandre Bóveda, con el intentaron aniquilar calquer forma de instrumentalización política organizada na procura de autogoberno para Galiza.
O 31 de Decembro lémbrase o fusilamento da Corporación municipal democrática de Marín a máns de militares sublevados. O 20 de Xullo de 1936, concretamente ás seis da tarde, o terceiro comandante do Polígono Jaime Janer, Pedro Nieto Antúnez, e forzas de mariñeiría rodeaban a Casa Consistorial e arrestaban ao Comité de Defensa da República formado principalmente por concelleiros republicanos e encabezado polo alcalde Antonio Blanco Solla. Ao mesmo tempo, o Xefe do Polígono de Tiro, Francisco Bastarreche, acompañado de oficiais e un pelotón de mariña percorrían as principais rúas da vila proclamando o estado de guerra. A 1ª Corporación Franquista recoñecería esta acción golpista coas rúas Bastarreche, Exército e Mariña e Polígono de Tiro Naval Janer, e máis tarde nomearon Fillos Adoptivos e Predilectos de Marín a Nieto Antúnez e a Bastarreche. Velaí unha cuestión de dignidade colectiva e xustiza cambiar os nomes de rúas e eliminar as distincións honoríficas do franquismo.
Ese día acababan con 40 anos dun forte dinamismo asociativo no concello. Entre 1898 e 1936 creáronse 8 sindicatos mariñeiros, como o anarquista Sindicato da Industria Pesqueira de Armando Iglesias e A Alianza Mariñeira de Urbano Mallo Crespo, 18 asociacións relacionadas co oficio do mar, 19 de oficios proletarios, 10 organizacións empresariais e comerciais, 12 agrupacións políticas locais, desde o Partido Galeguista (seica de Gastañaduy e Torres) pasando polo Socialista de Rodríguez Carranza, Blanco Solla, Hervés e Esperón Landín, o Comunista de Gómez Martínez, o Radical Republicano de Ulloa, Vinteño e Massoni, o Radical Socialista de Rey Fonseca e Vidal Pazos que xunto co Partido Republicano Galego de Blanco Porto e Luis de Santiago Graña formarían en 1933 Esquerda Republicana, o Partido Republicano Conservador de Casal Portela e do meu tío avó Manuel Milleiro, a Unión Rexional de Dereitas de José Teijeira, Darío Martín e José del Río. Así como outras 10 asociacións culturais, 9 lugares de recreo, 2 deportivas…Namentres o agrarismo marinense creaba máis dunha ducia de organizacións labregas fundamentalmente para loitar contra os foros. Deste movimento asociativo local e das que ainda sobrevivían antes do golpe, 19 serían declaradas fóra da Lei e os seus bens incautados pola ditadura.
No xuizo celebrado a mañán do 19 de Decembro de 1936, esperpéntico consello de guerra que como o de Bóveda e todos os realizados nesa época estaban cargados dun gran cinismo e hipocresía, eran sentenciados 14 veciños de Marín, 5 deles a morte sendo fusilados o 31 de Decembro. Nos meses seguintes uns 25 veciños e naturais de Marín serían asesinados, máis de 200 sufrirían as consecuencias do exilio, cárcere, depuración e deportación. Sen esquecer aos que morreron ou foron mutilados nunha guerra da que a maior parte dos que participaron non querían nin desexaban.
O 31 de Decembro e o 17 de Agosto representan a lembranza destes feitos e sirve para tomar conciencia de que esta historia e as súas consecuencias non se poden repetir. Temos a obriga de conservar a memoria porque un povo que esquece o seu pasado perde o respecto de seu.
Celso Milleiro Sánchez, Responsábel Local do BNG en Marín

Non nos extrana que María Ramallo non dea nin unha soa explicación sobre a súa xestión, nin a dos seus compañeiros do PP en relación co tema do porto. O que demostra o ben encamiñado que vai o BNG coa nosa proposta parlamentar.
Hai unha sentenza firme, e o PP tan só se dedica a combater ao BNG. Que non confunda á sociedade de Marín: que diga que é o que se vai facer para manter a actividade económica e os postos de traballo, que perigan como consecuencia de decisións ilegais tomadas polo PP. Que non nos veña que se sinte orgullosa, mais deberiamos de preguntarnos que se pode sentir orgulloso Marín da súa xestión…
Pasaron xa tres meses desde a sentenza, e María Ramallo aínda non demitiu nin pedeu perdón. Os recheos realizados durante a súa xestión á frente da Autoridade Portuaria fundaméntanse nos realizados con anterioridade, aqueles que o Tribunal Supremo declara ilegais.
Declaracións como as de María Ramallo certifican a súa incompetencia no exercicio dun cargo público. Non dá explicacións, non oferece ningunha solución, e criminaliza ao BNG, única forza política que no exercicio da súa responsabilidade reclama solucións definitivas ás aberracións cometidas polo PP.
É radicalmente falso o silenzo co que a voceira do PP nos caracteriza. Moi polo contra, o BNG, desde o Parlamento de Galiza e os concellos de Marín e Pontevedra foi a única forza política que criticou a política indiscriminada de recheos no porto, evitou a pretendida descarga de explosivos, exixiu medidas de protección para a poboación perante a descarga de determinados materiais, e cuestionou unha planificación portuaria ao servizo dos intereses de ENCE, e sacrificando un modelo de Marín aberto ao mar, que puidera conxugar a actividade económica e a xeración de emprego coa humanización deses espazos. O porto non pode ser un emirato alleo á realidade na que se insire: Marín.
Sra. Ramallo Marín ten a obriga de dar unha resposta as empresas e sobre todo os traballadores que a precisan, tivo a oportunidade de facelo mais é unha mágoa que, unha vez máis, non as dea. Con isto evidenciase a verdadeira faciana da súa Voceira e do Partido Popular, para Marín nada de nada, non existimos. Iso si, só traballan para eliminar todos os proxectos transformadores que puxo o BNG enrriba da mesa.

Hai uns días denunciabamos ante a opinión pública o desagravio comparativo da Deputación de Pontevedra (PP) con Marín en relación aos cartos que nos aporta por mor da crise económica e o silencio clamoroso do PP ao respecto.

Onte mesmo Xosé Mª Vilaboa, concelleiro do BNG, sacaba a relucir a intención da Xunta (PP), e en concreto do Presidente de Portos de Galiza, de transferir o Porto de Marín, é dicir o contrario do que predica a moción do PP. Isto provocou un nerviosismo apabullante na voceira do PP que se negou a replicar a Xosé Mª Vilaboa.

A medida que van transcurrendo os días os veciños de Marín podemos observar nidiamente a DEMAGOXÍA e DOBLE FACIANA que teñen os representantes do PP no Concello.