Pilar Blanco reclama tamén axilidade na tramitación do Convenio de Saneamento das Parroquias do Rural.

A portavoz do BNG, Pilar Blanco, interpelou está mañá na Comisión de Medio Rural, ao concelleiro delegado sobre a posta en funcionamento do saneamento da Moreira.
As obras do proxecto de saneamento da zona da Moreira, parroquia de San Xulián, acometéronse durante o anterior mandato municipal, dende a Concellaría de Medio Ambiente e con cargo ao Plan de Investimentos da Deputación Provincial. O remate das obras coincidiu co inicio do mandato do actual goberno do PP, quen a día de hoxe foi incapaz de poñelo en funcionamento.
“Despois de sete meses o goberno local non sabe dar explicacións de porque non funciona o saneamento da Moreira. Cónstanos que os veciños preguntaron en reiteradas ocasións por este problema pero non se lles deu nin solución nin unha resposta convincente”, afirma a portavoz do BNG.
O concelleiro delegado, recoñeceu en comisión que non sabe onde esta a Moreira e que non tiña coñecemento de que había un saneamento instalado e sen funcionamento nesa zona.
Nesta mesma situación atópase o saneamento de Resille que xa denunciou o BNG con anterioridade.
“Non hai outra razón que a desidia e a incompetencia deste goberno para explicar que obras levadas a cabo polo goberno anterior, e que os actuais gobernantes recibiron sen ter que facer esforzo ningún estean paralizadas neste momento”, afirma a edil nacionalista.
Os proxectos do convenio de saneamento sen entregar
Na mesma orde de cousas, a portavoz do BNG e anterior concelleira de Medio Ambiente, denuncia a parálise na tramitación dos proxectos correspondentes ao Convenio de Saneamento Integral das Parroquias do Rural asinado durante o anterior mandato municipal.
“O Concello ten pendente de tramitar os proxectos de Pereiro-O Pozo, Miñán- Esperela e Caños de Moledo-Loira, todos eles pendentes de tramitación por parte do goberno local, de xeito que a Xunta non pode licitalos”.
“Todos os proxectos foron corrixidos a requirimento de Augas de Galicia, polo cal non vemos ningún impedimento para a súa tramitación, a única razón volve ser a inoperancia do actual goberno que non da conta do recado”, afirma a concelleira nacionalista.
“Trátase de obras fundamentais para mellorar a calidade de vida nas parroquias do rural, e a pesar de que o PP local nunca fixo nada para lograr este convenio, a nosa responsabilidade dende a oposición e demandar que cumpran co convenio e envíen os proxectos canto antes”, finaliza Pilar Blanco.
Marín, 2 de febreiro de 2012

No pleno pasado quedou en evidencia o concelleiro de Medio Rural mentindo sen cortarse diante dos veciños/as de Fixón. Esta vez tócalle ao concelleiro de Deporte, Antonio Traba Miñones. Xa sabedes que declarou na prensa que dimitira como secretario do Club de Baloncesto Peixe Fresco, o mesmo día que saíra elixido concelleiro. Aquí tedes a proba de que non é así. Esta declaración xurada está dentro do expediente das subvencións deportivas do ano 2011. O señor Traba presentou como secretario do club toda a documentación correspondente ao Peixe Fresco.
Unha de dúas, ou a declaración é falsa ou segue sendo secretario do club. Creo que sobran comentarios.

A portavoz do Grupo Municipal do BNG, Pilar Blanco sae ao paso da comunicación por parte da Alcaldesa, en Xunta de Portavoces da resolución do contrato Arela Mobilidade por parte do Concello.
“Onte ás sete da tarde fun convocada a unha Xunta de Portavoces a celebrar hoxe as 13.00 h para tratar sobre as obras que se están a levar a cabo nas rúas do casco antigo de Marín en base ao proxecto Arela Mobilidade. Durante a Xunta de Portavoces comunicóusenos por parte da Alcaldesa e o Concelleiro de Urbanismo que o Grupo de Goberno vai resolver o contrato destas obras á empresa adxudicataria. En ningún momento durante a reunión se nos solicitou opinión, simplemente se nos comunicaron os feitos”.
“O BNG advertiu do mal desenvolvemento destas obras dende o mes de outubro, cando nos decatamos da paralización das obras nas rúas do Saco e Secundino Lorenzo. O día 20 de outubro convocamos unha reunión veciñal para recoller as queixas veciñais e solicitamos da Alcaldesa que recibise aos veciños. Estes nunca foron recibidos e a señora Ramallo nunca deu a cara para recoñecer e dar conta do que sucedía con estas obras”, afirma Pilar Blanco.
“Ate hoxe, día no que se nos comunica in extremis a resolución do contrato, e a pesares dos nosos ofrecementos de colaboración, nunca fomos convocados polo Goberno e a información a que tivemos acceso coñecémola por iniciativa propia”, continúa a edil nacionalista.
“Neste momento, despois de máis de seis meses en obras, as rúas abertas están sen rematar e as molestias e prexuízos causados aos a veciños residentes e comerciantes non sabemos cando cesarán nin como se indemnizarán. É practicamente seguro que a empresa adxudicataria recorra ao xulgado por non estar de acordo co Concello, e todos sabemos o tempo que se pode alongar a solución dunha causa xudicial”.
“Segundo informou a Alcaldesa a empresa pode seguir adiante coas obras mentres non se resolva o contrato, o cal sen dubida vai causar molestias e problemas aos veciños, que a día de hoxe non teñen ningún tipo de información por parte do Concello, o cal supón un desprezo en toda regra aos afectados directos desta situación”, asegura Pilar Blanco.
“Durante a reunión a Alcaldesa asegurou non sentir ningún tipo de responsabilidade política ante esta situación, o cal confirma o risco que corre o Concello de perder os Fondos Europeos conseguidos polo goberno anterior para reformar o casco antigo de Marín, e a falta de capacidade e a situación de desbordamento na que se atopa este Grupo de Goberno ante a herdanza de proxectos vitais para Marín recibida do goberno anterior”, afirma a portavoz do BNG.
“A nosa man segue tendida para que Marín non perda este importante investimento, pero dende o grupo de goberno non parece haber a humildade necesaria para aceptala nin para recoñecer os graves erros que agora desembocan nesta agoirada situación”, finaliza Pilar Blanco.

Pilar Blanco amosa a súa inquietude sobre os efectos que terá no PXOM en trámite

A portavoz do BNG, Pilar Blanco, cualifica de fraude a Marín o Plan Sectorial de Ordenación de Áreas Empresariais aprobado polo Consello da Xunta.
A voceira do BNG lembra que o propio Núñez Feijóo, en campaña electoral das municipais, anunciou en Marín que a Xunta faría un polígono industrial en Pastoriza de máis dun millón de metros cadrados, avalando a proposta do PP de Marín e da agora alcaldesa María Ramallo.
Hai que lembrar que a agora alcaldesa, estando na oposición, chegou a presentar unha moción ao Pleno propoñendo que o goberno local investise máis dun millón de euros, do II Plan E, en infraestruturas no monte de Pastoriza, para adiantar os pasos que daría logo a Xunta.
O Plan aprobado pola Xunta do PP, clasifica como inviables todos os polígonos recollidos no PXOM de Marín agora en trámite, e despraza o polígono de Pornedo cara a Pontevedra, de xeito que o termo municipal de Marín queda, practicamente, sen chan empresarial.
“Tendo en conta que os cálculos económico- financeiros e a avaliación ambiental estratéxica do PXOM se sustentan en base ao crecemento poboacional, e que este está directamente vinculado ao tecido empresarial e industrial, este Plan pon en serio perigo a tramitación do PXOM de Marín”, afirma Pilar Blanco.
Ao mesmo tempo que se declaran inviables os polígonos de Pornedo e Pastoriza, a Xunta cualifica de 8 sobre 10 o polígono de Vilaboa ligado ao Porto de Marín, proposto por Telmo Martín no 2010.
“Mentres a señora Ramallo permanece impasible ante a decisión da Xunta, Telmo Martín afirma que o polígono de Vilaboa será o porto seco que Marín necesita para emprazar as empresas incluídas nos 350.000 metros cadrados que o Tribunal Supremo declarou ilegais”.
“Se atamos cabos todo indica que a estratexia da Xunta, coñecida pola señora Ramallo, é beneficiar a Telmo Martín a través da impulsión público-privada do polígono de Vilaboa proposto por el mesmo”, afirma a concelleira nacionalista.
O estudo encargado pola Xunta, no que se basea a aprobación deste Plan de Áreas Empresariais para Galicia, empezouse a elaborar a principios do ano 2010 . En Marín só entrevistaron a cinco empresas, tres delas do Porto.
A propia Alcaldesa recoñeceu no pleno celebrado o pasado venres, que antes da aprobación por parte do Consello da Xunta, tivo conversas co Director Xeral de Vivenda e co Conselleiro de Industria sobre o seu contido, polo tanto era sabedora do contido do Plan e nin o deu a coñecer nin fixo nada ao respecto.
“A alcaldesa do mesmo Partido Popular ao que pertence o señor Telmo Martín e que dirixe a Xunta de Galicia, non pode limitarse a presentar alegacións coma se fóra un veciño máis ou un partido na oposición”. “Se Marín se vai quedar sen chan industrial temos dereito a sabelo, e a que a señora Ramallo nos diga en que se van quedar as súas promesas electorais de facer un polígono industrial en Pastoriza”, continúa Pilar Blanco.
Marín, 18 de xaneiro de 2012

Pilar Blanco afirma que este proxecto é vital para dinamizar economía de Marín

A portavoz do BNG, Pilar Blanco, reclama máis axilidade e información na tramitación do Área de Rehabilitación Integral (ARI) do centro histórico de Marín.
“O goberno da señora Ramallo, recibiu a declaración do ARI, de mans do Instituto Galego de Vivenda e Solo en xullo de 2011, nada máis acceder ao poder e despois de que o goberno anterior fixera todos os trámites para conseguir este proxecto”.
“O día 31 de xaneiro remata o prazo para que o Concello remita ao Instituto de Vivenda e Solo, a memoria que recolle as 30 actuacións concedidas para rehabilitar vivendas no casco antigo de Marín. Ademais o Concello debería ter aberto con tempo un prazo de solicitudes de axuda”, afirma Pilar Blanco.
“Tanto a alcaldesa como o concelleiro de urbanismo sabían dende o momento da concesión do ARI, que había que elaborar unha memoria que recollese o tipo de actuacións a levar a cabo e un listado de solicitantes, pero ate hai catro días non se deu ningún tipo de información, e agora só quedan apenas dúas semanas para que as persoas interesadas se inscriban no Concello”.
“Ademais o Concello ten que abrir unha oficina de rehabilitación e información no ámbito da actuación da que aínda non sabemos nada”.
“O BNG considera que este proxecto é vital para reactivar a estancada economía de Marín sobre todo no eido da construción, xa que posibilitara axudas de ate 10.000 destinadas a rehabilitación das vivendas do casco histórico”.
“O ARI é unha oportunidade tanto para os propietarios como para os autónomos que se dedican á construción, xa que se poden levar a cabo rehabilitacións integrais ou pequenas reformas”, continúa Pilar Blanco
“Se non hai información suficiente moitas persoas poden perder a oportunidade de facer a súa solicitude, e non se entende que coa necesidade de emprego que temos neste momento, o goberno do PP non poña máis interese neste proxecto”, afirma a portavoz do BNG.
“O concelleiro de urbanismo xa anunciou que non terá máis remedio que convocar un pleno extraordinario para tratar este tema, xa que non se chegará a tempo de introducilo na orde do día do pleno ordinario do día 13, e obrigatoriamente hai que aprobar toda a documentación, que aínda está sen elaborar, antes do 31 deste mes”, informa a concelleira nacionalista.
“É unha lástima que o actual goberno do PP non saiba xestionar a herdanza recibida, e trate con desdén e desinterese proxectos como o do ARI que repercuten directamente na creación de emprego, na economía e na calidade de vida da nosa cidade”, finaliza Pilar Blanco.
Marín, 7 de xaneiro de 2012

Pilar Blanco pregunta sobre a entrada en funcionamento do saneamento de Resille e a reposición de camiños en Pardavila-Fixón

A portavoz do BNG, Pilar Blanco, interpelou hoxe na comisión informativa de Medio Rural ao goberno local, sobre diversas deficiencias nas parroquias do Concello.
A concelleira nacionalista reclamou a instalación dun punto de luz en Bagüín, solicitado e concedido dende hai meses pero pendente aínda de instalar. Tamén solicitou que se repoñan os cristais da marquesiña de autobuses que serve de abrigo aos escolares da Barriada de Mogor. “O Concello retirou os cristais deixando o marco espido e co restos incrustados de xeito que supoñen un perigo”.
A limpeza do manancial da Fonte de Sanxurxo, atascado dende hai días, foi outra das peticións. “ A pesares das queixas veciñais o manancial segue atascado e a auga verte para o pozo de regar en lugar de saír polo bico, estragándose gran parte da auga”.
Saneamento en Resille e en Pardavila-Fixón
Pilar Blanco reclamou na comisión de Medio Rural que se poña en funcionamento o saneamento de Resille, na parroquia de Ardán. A pesares de que as obras, levadas a cabo polo goberno bipartito, remataron no mes de maio do ano pasado, o goberno actual do PP aínda non foi quen de poñelo en funcionamento.
“Esta é a terceira vez consecutiva que pregunto pola posta en funcionamento do saneamento de Resille. Nesta ocasión, o concelleiro delegado asegura que non está en marcha porque depende de obras pendentes no Concello de Bueu. Na práctica os veciños seguen sen servizo pola falta de xestión dun goberno que sempre encontra desculpas á súa falta de capacidade para resolver os problemas ”.
A portavoz do BNG tamén requiriu información sobre as obras de saneamento en Pardavila-Fixón correspondentes ao Convenio asinado entre a Xunta de Galiza e o Concello de Marín durante o mandato anterior, para sanear integramente as parroquias do rural.
Nesta ocasión Pilar Blanco preguntou sobre a reposición dos firmes afectados polas obras e polo expediente de construción dun muro non contemplado no proxecto.
O proxecto aprobado polo Concello e pola Xunta recolle a reposición do firme de todos os camiños afectados en todo o seu ancho e longo, xa que se trata de pistas moi estreitas e que xa se atopaban en mal estado antes das obras. Nalgún tramo nin sequera había firme. O goberno actual en conivencia coa Xunta pretende simplemente repoñer a gabia aberta para instalar as canalizacións, deixando os camiños sen asfaltar. “Isto contradí claramente o recollido no proxecto e as aspiracións dos veciños que xa están entregando sinaturas para reclamar a reposición dos camiños”, informa a portavoz do BNG.
Pilar Blanco tamén preguntou pola construción dun muro na zona de Fixón. “O concelleiro delegado asegurou publicamente no Pleno de decembro que a obra estaba a ser executada polo Concello e que existía proposta de gasto. A realidade é que a proposta non aparece e hoxe Ramiro Gestido recoñeceu que a obra está a executarse sen ningún tipo de expediente de adxudicación”. “A día de hoxe, e sempre segundo o concelleiro, non se sabe quen vai pagar a obra porque están a facer xestións coa Xunta”. “Ante a petición de consultar o expediente o concelleiro asegurou que estaba en posesión da Alcaldesa e que de momento non podiamos ter acceso a el”, asegura Pilar Blanco.
“Resulta totalmente imposible saber que parte do afirmado polo concelleiro é verdade porque non podemos acceder aos expedientes que están custodiados pola Alcaldesa, algo totalmente anormal nunha administración democrática”, afirma Pilar Blanco.
“O BNG reclamará toda a información por escrito e a súa vez transmitirá aos veciños toda a información que lles está a ocultar o PP”, finaliza a portavoz do BNG.
Marín, 3 de xaneiro de 2012

Pilar Blanco afirma que o PP paralizou o proxecto redactado polo Bipartito da Xunta en 2009

A portavoz do BNG, Pilar Blanco, reclama que se acometan as obras de seguridade viaria na PO-551 ao seu paso por Bagüín na parroquia de Mogor.
Pilar Blanco lembra que en marzo de 2010 a Concellaría de Urbanismo dirixida polo nacionalista Xosé María Vilaboa, paralizaba as obras de reposición da liña eléctrica área por parte de Fenosa, na recta de Bagüín por non contar con licenza municipal e non respectar as aliñacións marcadas pola Lei de Estradas.
“A reposición da liña aérea conlevaba a colocación de novos postes na beiravía da estrada o cal na práctica, impediría levar a cabo o proxecto de seguridade viaria neste tramo reclamado polos veciños e polo BNG dende hai anos”, indica a portavoz nacionalista.
“Despois de case dous anos de espera, fixo falta que se producise un apagón de tres horas na parroquia de Mogor que afectou a 1200 vivendas, para que a Xunta e Fenosa iniciasen por fin as obras de soterramento da liña eléctrica”. “A Xunta e o PP teñen pouco de que gabarse neste tema xa que as obras só acadan os 50.000 €, dos cales a Consellaría de Industria achega 14.000, unhas cifras menores comparadas cos ingresos de Unión Fenosa e cos prexuízos causados por o corte de luz. Ademais a día de hoxe ningún responsable da Xunta deu explicacións deste retraso”, afirma a edil nacionalista.
“As obras consisten na apertura dunha gabia de 1 metro de fondo por 40 centímetros de ancho, e en ningún momento se acomete o ensanchamento necesario da beiravía para proceder despois a acondicionar a marxe da estrada con beirarrúas ou paseo que permitisen que os peóns poidan camiñar con seguridade por este tramo perigosísimo”, continúa Pilar Blanco.
“A Xunta conta cun proxecto de seguridade viaria para a estrada PO-551 ao seu paso por Bagüín que foi paralizado polo PP en base a que non conta cos terreos necesarios para ensanchar a beiravía, pero este non é o motivo real xa que a seguridade das persoas debe estar por riba doutros intereses e a Xunta está obrigada a garantir a seguridade da estrada tanto para os vehículos como para os peóns”, afirma a concelleira do BNG.
“Temos que lembrar que en xullo deste ano o señor Cores Tourís, nunha visita a Marín con motivo da toma de posesión da alcaldesa do PP, reclamaba da señora Ramallo que o Concello expropiase os terreos necesarios para executar a obra dunha senda peonil neste tramo, pero a día de hoxe nin a Xunta nin o goberno local parecen estar de acordo en como acometer as obras”.
“O BNG non deixará de reclamar que se leve a cabo este proxecto, aínda que sabemos que non é unha prioridade para o PP, xa que a semana pasada rexeitou a emenda aos orzamentos da Xunta para que se reservase a partida necesaria para a execución destas obras”, finaliza a portavoz do BNG.

Marín, 1 xaneiro de 2012

Pilar Blanco denuncia que a lama inunda este espazo dende hai días

A portavoz do BNG Pilar Blanco denuncia o estado de abandono da Fonte do Piteiro.
“Se hai uns días denunciabamos o abandono da fonte da Banda do Río, agora temos que avisar do estado no que se atopa a fonte do Piteiro”, afirma a portavoz do BNG.
“O lodo invade o empedrado que rodea a fonte de xeito que é imposible achegarse para coller auga sen enterrar os pés na lama. As hedras e as silvas colgan do muro que está detrás e non deixan xa ver a placa conmemorativa da restauración deste ben municipal no ano 2008”. “Tampouco se acometeu a correspondente limpeza do manancial situado a poucos metros da fonte, no canellón Piteiro, e a auga que sae agora polo bico é só un fiíño. A isto engádese tamén que os focos que sinalizan a fonte pola noite non alumean, porque a lama que os cubre impide que saía a luz”.
“O Concello acometeu a restauración da fonte do Piteiro, próxima a Ponte Zapal, no ano 2008, a cal levaba moitos anos esquecida. A restauración protexeuna dos coches cun empredado elevado, fíxoa accesible e dotouna de luz, ademais de recuperar o manancial que a alimenta. Dende entón son moitas as persoas que serven dunha das poucas fontes urbanas con manancial propio que quedan en Marín”.
“O BNG reclama unha vez máis que o goberno da señora Ramallo cumpra coa súa obriga de manter os bens municipais e de atender as tarefas diarias que os cidadáns pagan cos seus impostos”, finaliza Pilar Blanco.
Marín, 26 de decembro de 2011

Xosé María Vilaboa afirma que “agora acabáronse as presas para construír o Centro de Saúde”

O concelleiro do BNG, Xosé María Vilaboa, informa de que o goberno do PP está a retrasar a modificación das Normas Subsidarias que permiten a construción do Centro de Saúde.
“O pasado 11 de novembro o Pleno da Corporación aprobou por unanimidade a modificación das Normas Subsidiarias despois do correspondente prazo de exposición pública, que permitirá a construción do Centro de Saúde de Marín. Sorprendentemente, tratándose dun proxecto tan importante, o goberno actual retrasou o envío desta documentación á Consellaría de Sanidade máis dun mes dende a aprobación”, informa o edil nacionalista.
“Este non é a primeira demora provocada polo goberno de María Ramallo en relación co Centro de Saúde. Despois da aprobación inicial en pleno desta modificación o mes de xullo pasado, o goberno do PP tardou dous meses en remitir a documentación para a súa publicación no DOG. Un trámite que se puido ter feito ao día seguinte do Pleno”, asegura o concelleiro do BNG.
Hai que lembrar que o SERGAS remitiu ao Concello a finais de 2010 o anteproxecto da obra do Centro de Saúde. O documento non respectaba os parámetros urbanísticos da parcela posta a disposición do SERGAS no ano 2009. O PP, coa señora Ramallo á cabeza, iniciou por aquel entón un ataque continuado contra o equipo de goberno, acusándoo de paralizar os trámites para construír o Centro de Saúde.
Nun corto espazo de tempo, que deixa en ridículo ao actual goberno do PP, dende a concellaría de urbanismo dirixida por Xosé María Vilaboa, redactouse e tramitouse a modificación das Normas Subsidiarias necesaria para satisfacer os requirimentos do SERGAS e acadou os informes favorables da Secretaría Xeral de Urbanismo e Augas de Galicia, e tramitou e elevou a exposición pública o documento de Avaliación Ambiental esixido pola Consellaría de Medio Ambiente.
“A construción do Centro de Saúde debe ser unha prioridade para o goberno local. Dende a toma de posesión do PP na Xunta de Galiza asistimos a reiteradas promesas de construción e licitación das obras por parte da Conselleira de Sanidade e da Sra. Ramallo, pero a día de hoxe a única medida de importancia relacionada coa sanidade por parte do PP, foi a de deixarnos sen ambulancia máis de 12 horas ao día”, afirma Xosé María Vilaboa.
“A estas alturas xa nos queda claro que o único que perseguía a señora Ramallo e o PP presentando un anteproxecto antes das eleccións municipais era o rédito electoral. Agora xa non hai presas nin se dan explicacións”.
“O último acontecemento, que deixa moi poucas esperanzas de que Marín conte con Centro de Saúde, é o rexeitamento, por parte do PP, a todas as emendas presentadas polo BNG aos orzamentos da Xunta aprobados esta semana. Entre elas a relativa ao Centro de Saúde aprobada co voto a favor do PP no Pleno do Concello”.
“Aínda non escoitamos á señora Ramallo exercer de alcaldesa e esixir da Xunta a construción dun equipamento básico e urxente como o Centro de Saúde, demostrando unha vez máis o seu servilismo cara ao PP antes que a defensa dos intereses de Marín”, finaliza Xosé María Vilaboa.

Marín, 23 de decembro de 2011

A portavoz do BNG, Pilar Blanco, denuncia o total abandono ao que o Goberno local ten sometido o entorno da praia de Portocelo e o paseo do vial de praias. A portavoz nacionalista informa tamén de que a marquesiña de autobuses que serve de abrigo aos escolares da Barriada de Mogor, leva rota dende o sábado pola noite.
“O paseo presenta un aspecto penoso, sobre todo dende o seu inicio ate a praia de Portocelo. Neste tramo as codias dos eucaliptos, paus e sementes destas árbores acumúlanse no paseo de xeito que non se pode nin andar, e os transeúntes vense na obriga de camiñar pola estrada”, afirma a concelleira nacionalista.
“O bar de Portocelo, que tanto preocupaba ao PP na oposición, presenta un aspecto aínda peor. Os cristais das ventás e das portas están rotos e ciscados polo chan de xeito que calquera se pode cortar senón está atento a onde pisa, as portas están forzadas, e o cartel que anuncia a existencia do bar está tirado no chan”.
“En canto ao espazo de esparexemento que rodea o edificio, esta cheo de follas e polas das árbores e incluso falta un tramo da varanda de ferro forxado que serve de protección, de xeito que calquera rapaz pode caer dunha considerable altura senón se decata da situación”.
“Incluso desapareceu o cartel indicativo dos aparellos do parque biosaúdable instalado no mandato anterior”.
A portavoz nacionalista asegura que está situación de abandono dura semanas. “O último acontecemento tivo lugar a noite do sábado, cando apareceron rotos os cristais da marquesiña de autobuses que serve de abrigo aos escolares da Barriada de Mogor. A pesar dos avisos dos veciños, os cristais non se recolleron ate última hora da mañá de hoxe co perigo conseguinte para os nenos”, informa a edil nacionalista.
“Grazas aos esforzos do goberno anterior Marín conta cun paseo dende Portocelo a Aguete dotado de alumeado e parque biosaudable. Pola contra o goberno do PP paralizou o proxecto do goberno anterior de converter o bar de Portocelo en “Centro de Interpretación da Cultura Marítima”, e agora mantén o edificio e o entorno no máis absoluto abandono sen facer un mínimo mantemento”. “A día de hoxe non sabemos que pretende facer o goberno con este edificio” , continúa Pilar Blanco.
“Hai só uns meses, o PP parecía non ter outra preocupación que abrir o bar de Portocelo, e agora son incapaces de facer o máis básico.” “O Concello conta agora cos mesmos medios que antes e incluso con máis, xa que dende o PP gábanse de contar coa axuda da Deputación, sen embargo son incapaces de continuar o labor iniciado dende o goberno anterior e isto só é achacable á súa incompetencia”, afirma a portavoz do BNG.
“Dende o BNG lamentamos esta situación, e reclamamos do goberno dirixido por María Ramallo que se centre en atender o día a día do Concello e non deteriore máis os servizos básicos aos que todos os cidadáns contribuímos cos nosos impostos”, finaliza a portavoz do BNG.
Marín, 21 de decembro de 2011