DEFENDER O PORTO

Desde a caverna mediática marinense, unha e outra vez, se escribe dos problemas urbanísticos que está a sufrir o Porto de Marín e as empresas asentadas en el esquecendo que ditos problemas, non naceron pola falta de conciencia dos xuíces para coas empresas e os veciños de Marín cando ditan sentencias, que puideran levar por diante o progreso e o sustento nos tempos que corren, senón pola falta de rigor dos políticos responsables en cada caso.

Non hai mellor cego que o que non queira ver, ou de quen opina ocultando na súa información o que se recolle nas sentencias que ditaron os xuíces, quen cumprindo coa súa obrigación, declaran ilegais os plans urbanísticos do Porto por incumprimento da lei e responsabilizan dos feitos ás administracións competentes ( Autoridade Portuaria, Deputación e Xunta ). Estas administracións tiñan e teñen, dirixentes que cobran cartos públicos por xestionalas e facer o seu labor cumprindo coa lei.

Dá a casualidade de que os dirixentes anteriores e actuais das administracións responsables desta desfeita urbanística, eran e son as mesmas persoas, a Sra Ramallo, Sr. Louzan e o Sr. Feijóo, e terán que asumir as súas responsabilidades e dar unha explicación pública dos efectos que terá o cumprimento das sentencias e dicirnos a todos os marinenses, e sobre todo ás empresas que se ven nesta situación complicada, como o van a solucionar a hecatombe a que nos abocaron.

Como dano colateral, o noso Concello pode verse afectado por esta desfeita, polas reclamacións das empresas ao ver as súas licencias nunha situación alegal, por exemplo Tradepana, empresa á que se lle dou licenza en cumprimento da lei, cos informes favorables dos técnicos municipais en base ao Plan Especial do Porto do 2005 agora declarado ilegal. Plan confeccionado pola Sra. Ramallo durante o seu paso pola Presidencia do Porto. ¿ Non ten responsabilidade a Sra. Ramallo, que cobraba un supersueldazo como presidenta e gozaba de Audi, todo pagado con cartos públicos?

O Porto, as empresas e sobre todo os postos de traballo deféndense facendo as cousas cumprindo coa lei e asumindo as responsabilidades, e non ocultando e esperando a que o tempo traia unha solución ao desmantelamento do Porto.

Dende o BNG, cos tres escanos elixidos democraticamente polos marinenses/as, vimos de defender os miles dos postos de traballo pedindo unha explicación aos responsables da desfeita, e unha solución para as empresas asentadas no Porto, mantendo unha postura de cordura e sabendo que o Porto defendese respectando a lei e esixindo á Sra. Ramallo que asuma a súa responsabilidade.

A nosa sociedade esta farta de políticos de media caña que poñen en risco coas súa incompetencia a economía de toda unha comarca, e de cavernas mediáticas que ocultan a información á cidadanía e mandan “callar”, estilo borbónico, a quen lles esixe responsabilidades e explicacións.

Isto non recorda outra época?.

Xosé María Vilaboa Ramos

Marín, 27 de febreiro de 2012

Os nacionalistas fanse eco das queixas da Asociación Veciñal Labirinto de Mogor

A portavoz do BNG, Pilar Blanco, informa que Olaia Fernández Davila, deputada no Congreso dos Deputados da formación nacionalista, ven de presentar unha iniciativa en relación ao fallos no sinal de televisión dixital na parroquia de Mogor.
A portavoz nacionalista informa de que xa en agosto pasado, a Asociación Veciñal Labirinto de Mogor, se dirixira ao Departamento Territorial da Consellaría de Economía e Industria en Pontevedra, para reclamar que se tomasen medidas o sinal de televisión dixital na Parroquia de Mogor se mellorase, xa que con mal tempo prodúcense continuos cortes do sinal chegando a non percibir ningunha imaxe. A queixa presentouse acompañada de sinaturas dos veciños afectados.
A Xunta ven de responder aos veciños que a solución a este problema non lle compete e remitiunos ao Ministerio de Industria.
Ante a falta de resposta da Xunta, o BNG diríxese agora directamente ao Ministerio de Industria, e presenta unha pregunta no Congreso sobre os problemas que padecen os veciños e veciñas de Mogor para recibir o sinal de televisión adecuadamente.
Marín, 27 de febreiro de 2012

NOTA: axuntamos documentación relativa á pregunta presentada no Congreso e o escrito que en agosto presentou a AAVV na Consellaría de Industria: Sinal TV Mogor

As empresas quedan sen protección legal urbanística e moitos postos de traballo poden perigar

Contido e consecuencias da sentenza
O Tribunal Superior de Xustiza de Galiza (TSXG) ven de declarar nulo o Plan Especial do Porto de Marín aprobado pola Xunta no ano 2005. A sentenza emitida polo TSXG ratifica a emitida polo Tribunal Supremo en relación coa licenza concedida á nave de Cabomar (antes Tradepana) e ordena o derribo da nave que terá que executar o Concello. Ante esta sentenza non cabe recurso.
As repercusións sobre o Porto de Marín son gravísimas. Practicamente todo o solo portuario queda sen regulación urbanística. “Para entendelo cun exemplo práctico, é como se Marín aprobase o PXOM, e ao cabo de tres ou catro anos se declarase nulo. Todo o edificado ate entón quedaría en vilo e habería que paralizar por completo todo tipo de actividade relacionada co urbanismo”, indica Xosé María Vilaboa.
Neste momento as empresas están en situación alegal, as que teñen licenza quédalle anulada e as que non a teñen non se sabe cando e como poderán obtela. Isto significa que non poderán ampliar a súa actividade e moito menos regulala. Ademais pecháselle a oportunidade de obter subvencións e posiblemente perderán as que teñen comprometidas.
Todas as actuación vinculadas ao espazo portuario, como o Auditorio, ou o aparcadoiro da Praza de España son neste momento inviables.
Ocultismo da Alcaldesa
“A sentenza chegou ao Concello o día 13, pero os grupos da oposición aínda non fomos informados oficialmente. As primeiras noticias foron a través da prensa. É máis, nin sequera o servizo de urbanismo do Concello tiña coñecemento a día de onte, o cal é incomprensible tendo en conta que teñen que informar e tramitar licenzas ligadas ao Porto”, afirma a portavoz do BNG, Pilar Blanco.
“É lóxico que a señora Ramallo teña un especial interese en ocultar esta sentenza, xa que ela era presidenta da Autoridade Portuaria no 2005 é a máxima responsable da tramitación deste Plan xunto con Feijóó, vicepresidente da Xunta e conselleiro de Ordenación do Territorio, por aquel entón. A Autoridade Portuaria tramitou o Plan e a Xunta aprobouno”, sinala a edil do BNG.
Responsabilidades
A sentenza demostra que o BNG tiña razón cando afirmou que o Plan do 2005 era un remendo para tapar as deficiencias do Plan do ano 2000 anulado tamén polo Tribunal Supremo, e que ademais pretendía legalizar os recheos ilegais denunciados pola Plataforma para a defensa de Praceres, motivo polo cal se inicia este proceso.
“Hoxe xa non é posible señora Ramallo e o señor Feijóo pedir a dimisión dos cargos que ostentaban no ano 2005, pero si debería dar explicacións de porque se chega a esta anulación, da situación na que queda o Porto e de cómo pensan solucionalo”.
“Nin a señora Ramallo, nin a Xunta nin a Autoridade Portuaria poden mirar para outro lado neste gravísimo problema, porque son os responsables directos”.
“Este final é a herdanza do paso da señora Ramallo pola presidencia da Autoridade Portuaria, a tramitación e aprobación dun Plan que agora paraliza e limita as posibilidades de desenvolvemento do Porto”, finaliza a portavoz do BNG.
Marín, 24 de febreiro de 2012

Acto Público do BNG en Pontevedra perante a folga xeral do 29 de Marzo, este xoves no Teatro Principal de Pontevedra coa presenza de Miguel Anxo Fernández Lores, Suso Seixo e Francisco Jorquera.

Pilar Blanco afirma que o BNG seguirá pedindo responsabilidades á Xunta de Galiza

O BNG amosa a súa solidariedade cos traballadores e traballadoras de Factoría Naval que veñen de recibir a carta de despido, e afirma que seguirá esixindo responsabilidades á Xunta por ser a máxima responsable de que o asteleiro despida hoxe a máis de 30 traballadores.
A portavoz do BNG, que está mañá mantivo un pequeno encontro cos traballadores ás portas do asteleiro, puido comprobar que o Plan de Viabilidade que presentou a empresa, non ocupa máis que a cara dun folio. “Resulta inadmisible que a Xunta acepte o contido deste ERE que avalía en pouco máis de 300 palabras o traballo de persoas cualificadas que se quedan sen emprego pola mala xestión da empresa e da Xunta”, afirma Pilar Blanco.
A Xunta, e nomeadamente os conselleiros de Industria e Traballo, veñen de incumprir o compromiso acadado o pasado día 17, cando despois da comparecencia no Parlamento Galego, a petición do BNG a través de Bieito Lobeira, comprometéronse a falar cos traballadores antes de admitir o ERE. “O comité de empresa non recibiu ningunha noticia nin chamada dende ese día por parte da Xunta”, afirma a edil nacionalista.
“Tampouco a señora Ramallo deu sinais de vida, despois de erixirse en intermediaria entre a Xunta e os traballadores, e parece máis ocupada en repartir premios e filloas que en defender os postos de traballo no noso Concello”.
“A Xunta entregou 22 millóns de euros para reflotar Factoría Naval, en base a un Plan de Negocio que tiña que garantir o mantemento dos postos de traballo. Hoxe, desgraciadamente vimos de comprobar que iso non se cumpriu. A Xunta debe pedir responsabilidades aos empresarios que agora intentarán executar os avais deses 22 millóns de cartos públicos”, engade Pilar Blanco.
Con Factoría Naval caen tamén empresas auxiliares vinculadas á actividade do asteleiro, e pérdense outros postos de traballo dentro e fóra do ámbito do Porto, e o paro no noso Concello segue medrando.
O BNG fará todo o posible para defender un sector que considera estratéxico para Marín e para o conxunto de Galiza. No 2008 o Naval daba emprego directo a 10.000 persoas, hoxe sofre un serio perigo de supervivencia como se ven de demostrar hoxe con Factoría Naval.
Por desgraza os nosos intentos chocan sempre coa oposición dos gobernos do PP e do PSOE, que se esquecen de Galiza onde teñen poder para defendela. Así ven de suceder coa última proposición non de lei presentada polo BNG no Congreso e defendida por Francisco Jorquera o pasado día 21. O PP votou en contra das 14 medidas que propoñía o BNG para garantir a viabilidade futura do sector naval tanto público coma privado en Ferrol e Vigo.
Marín, 23 de febreiro de 2012

MOCIÓN DE REXEITAMENTO DA REFORMA LABORAL APROBADA POLO GOBERNO CENTRAL
O Grupo Municipal do BNG presenta a seguinte moción relativa ao rexeitamento da reforma laboral aprobada polo Goberno Central, para os seu tratamento polo Pleno da Corporación Municipal,
EXPOSICIÓN DE MOTIVOS
O Goberno central vén de aprobar unha ampla reforma do réxime laboral, que suporá unha mudanza substancial no réxime de relacións laborais en Galiza.
O Real Decreto-Lei 3/2012, do 10 de febreiro, de medidas urxentes para a reforma do mercado laboral, socava as bases sobre as que se asentaban as relacións laborais, contendo medidas concretas que, xa desde a súa entrada en vigor, limitan os dereitos dos traballadores e traballadoras, tanto no que atinxe aos seus dereitos económicos como á súa capacidade de negociación laboral.
Porén, como o propio Goberno vén afirmando, esas medidas non contribuirán de xeito directo a xerar emprego nin a mellorar a estabilidade laboral das persoas que na actualidade ocupan postos de traballo en precarias condicións. Confírmase así, que o verdadeiro programa de Goberno do PP é aplicar unha política económica ao servizo de quen máis ten, en prexuízo das maiorías sociais cuxo sustento depende do seu traballo. Constátase que o verdadeiro propósito do Goberno actual consiste en empregar a crise económica como pretexto para atacar os dereitos dos traballadores e traballadoras, rebaixando as súas condicións laborais.
A reforma laboral aprobada debilita a posición das persoas traballadoras ao tempo que reforza os poderes de dirección da empresa, outorgándolle capacidade para interpretar e desenvolver de xeito unilateral as condicións de traballo pactadas tanto a nivel individual en contrato de traballo como as derivadas de acordos globais sustentados na negociación colectiva. Dese xeito, a nova regulación laboral:
• Reduce as indemnizacións por despedimento improcedente case nun terzo, afectando tamén a dereitos consolidados de traballadores e traballadoras contratados hai anos.
• Estende as posibilidades de abaratar os despedimentos, ao ampliar os supostos para poder extinguir contratos laborais por mor de causas obxectivas, en base mesmo a situacións conxunturais dunha empresa e non estruturais.
• Permite a aplicación de medidas de flexibilización interna de xeito unilateral por parte das empresas que favorecerán desde a extensión de regulacións de emprego, pasando pola mobilidade xeográfica forzosa, até mesmo a imposición obrigatoria de redución de xornadas e salarios.
• Desampara ás persoas traballadoras no caso dos despedimentos colectivos, ao eliminar o control da administración laboral na aprobación dos expedientes de regulación de emprego, obrigando a acudir a un control xudicial, tamén máis limitado.
• Crea un contrato indefinido específico, denominado “de apoio aos emprendedores”, mais aplicábel ao 99 por 100 da empresas en Galiza, que permite o despedimento libre e gratis total durante o primeiro ano.
• Racha co sistema de negociación colectiva sectorial e territorial, que beneficiaba ao colectivo de traballadores e traballadoras que desenvolven a súa profesión en actividades análogas ao homologar as condicións e traballo con independencia da empresa concreta onde traballan, deixando en mans da dirección empresarial a devaluación das condicións de traballo reguladas nos convenios de ámbito supraempresarial.
A reforma laboral imposta de xeito unilateral polo Goberno central terá un impacto negativo nas condicións de traballo e económicas das persoas traballadoras neste concello, que son a maior parte da nosa poboación e merecen dun respaldo institucional perante o ataque emprendido contra os seus dereitos, que forman parte das conquistas sociais atinxidas en beneficio das maiorías sociais.
O noso Concello debe expresar o seu rexeitamento a esta reforma laboral que, lonxe de ser equilibrada como se afana en difundir -con afán de confundir- o Goberno central, en realidade mingua dereitos regulados en normas públicas que favorecían ás persoas traballadoras, para que fiquen a vontade das decisións empresariais e desposuídos de calquera capacidade de negociación e presión para mellorar as súas condicións socioeconómicas.
Polo exposto, solicitamos do Pleno da Corporación Municipal a adopción do seguinte
ACORDO
1. Manifestar o rexeitamento da Corporación municipal á reforma laboral aprobada polo Real Decreto 3/2012, do 10 de febreiro, instando ao Goberno central a:
1. Proceder á derrogación de dita norma.
2. Acometer unha mellora das relacións laborais, en base ao consenso e negociación cos representantes sindicais , que protexa ás persoas traballadoras fronte á precariedade laboral e inclúa estímulos reais para a xeración de emprego de xeito inmediato.
2. Comunicar o presente acordo aos grupos parlamentares do Congreso de Deputados e Parlamento de Galiza, Presidente do Goberno do Estado e Presidente da Xunta de Galiza.
A portavoz municipal,

Pilar Blanco López
Marín, 22 de febreiro de 2012

MOCIÓN DE APOIO Á INICIATIVA LEXISLATIVA POPULAR PARA A DEFENSA E PROMOCIÓN DA SANIDADE PÚBLICA EN GALIZA

O Grupo Municipal do BNG, presenta a seguinte moción relativa á iniciativa lexislativa popular para a defensa e promoción da sanidade pública en Galiza, para o seu tratamento polo Pleno da Corporación Municipal,
EXPOSICIÓN DE MOTIVOS
A Plataforma SOS Sanidade Pública está a promover unha Iniciativa Lexislativa Popular (ILP) coa finalidade de deter a política de recortes e privatizacións da Sanidade Pública impulsada polo actual Goberno Galego e co fin de garantir o dereito constitucional á protección da saúde dos galegos e galegas.
O artigo 43 da Constitución recoñece o dereito á protección da saúde, correspondendo aos poderes públicos organizaren e tutelaren a saúde pública, mediante as medidas preventivas, as prestacións e os servizos necesarios. É competencia do Goberno da Xunta de Galiza, o desenvolvemento lexislativo e a execución da lexislación básica do Estado en materia de sanidade interior, así como en materia de Seguridade Social, excepto as normas que configuraron o seu réxime económico.
A sanidade pública constitúe -xunto co ensino e os demais servizos públicos- un elemento básico do Estado Social e un claro indicador de equidade e solidariedade. Nas últimas décadas, porén, estes principios aparecen cuestionados por unha campaña neoliberal de ataque e desmantelamento dos sistemas públicos de saúde. A decisión de combinar unha redución do orzamento sanitario co recurso ao sector privado para construír, restaurar, equipar e xestionar os centros sanitarios leva ao sistema a unha situación de limitación dos recursos necesarios para o mantemento da actividade dos servizos, e a un grao de endebedamento incompatíbel co sustento do sistema público, cando menos nas condicións actuais de universalidade e gratuidade no momento do uso, e que garanten a accesibilidade á atención de saúde e condicións equitativas para toda a poboación.
A finalidade da proposición de Lei, presentada pola Plataforma SOS Sanidade Pública vía iniciativa popular, é frear esa tendencia privatizadora mediante a defensa e promoción da sanidade pública galega como garantía para a efectividade do dereito constitucional á protección da saúde.
Así pois, a proposición de Lei opta expresamente pola xestión pública directa das institucións sanitarias do Sistema de Saúde de Galiza, na liña histórica marcada pola Lei 14/1986, do 25 de abril, Xeral de Sanidade. Rexéitanse así as fórmulas de colaboración público-privada (private finance initiative ou concesión de obra pública), que en países do noso contorno produciron un contrastado empeoramento da calidade asistencial e un enorme aumento dos custos sanitarios.
A proposición de Lei pretende tamén mellorar o servizo público prestado á cidadanía incrementando a capacidade resolutiva en atención primaria como instrumento de achegamento dos servizos de saúde ao territorio e que terá unha grande incidencia na redución dos tempos de espera hospitalaria.
Finalmente, a proposición de Lei configura un sistema de xestión descentralizado territorialmente, promovendo a autonomía das áreas sanitarias, sen que isto supoña a renuncia a decisións centralizadas sobre cuestións concretas que melloren a efectividade das decisións.
Polo exposto, solicitamos do Pleno da Corporación Municipal a adopción dos seguintes
ACORDOS
PRIMEIRO- Manifestar o apoio da Corporación municipal á Iniciativa Lexislativa Popular impulsada pola Plataforma SOS Sanidade Pública e dar traslado do mesmo á presidenta do Parlamento de Galiza, portavoces parlamentares e presidente da Xunta de Galiza.
SEGUNDO- Animar aos veciños e veciñas do noso concello a colaborar con esta iniciativa.
TERCEIRO- Instar á Xunta de Galiza e á Consellaría de Sanidade a garantir a Sanidade Pública como servizo universal, gratuíto e de calidade e a manter a xestión pública e directa do Sistema de Saúde de Galiza

A portavoz do BNG,

Pilar Blanco López

Marín, 13 de febreiro de 2012

Venres 24 de Febreiro, ás 20:30 horas, na Biblioteca Municipal de Marín: Situación do Euskera polo deputado Jon Iñarritu, de Amaiur.

Pilar Blanco afirma que a Alcaldesa infrinxe as mínimas normas de respecto polos demais grupos municipais

A portavoz do BNG, Pilar Blanco, informa de que o venres 17 de febreiro, día no que se celebrou un concerto dos alumnos e alumnas da Escola Municipal de Música, recibiu unha mensaxe da Alcaldía, no seu teléfono móbil informándolle da celebración do concerto, dúas horas antes de que comezase o mesmo.
“Tanto a min coma aos meus compañeiros de grupo municipal se nos comunicou a celebración do concerto que ía ter lugar con motivo do novo emprazamento da Escola de Música, na Finca de Briz, con apenas dúas horas de antelación”, asegura a portavoz do BNG.
Posteriormente comprobamos que tamén se enviara un correo electrónico dende a Alcaldía, convidándonos ao pregón do Entroido, e no mesmo, a xeito de nota, lembrábase a celebración do concerto. Este e-mail tamén foi remitido o mesmo día 15 con só unhas horas de antelación.
“ A día de hoxe, e a pesares de ter solicitado que se desculpase a miña ausencia, aínda non recibimos ningunha explicación do Concello”, afirma a portavoz do BNG.
A portavoz do BNG ven de dirixir unha carta á directora da Escola Municipal de Música explicando os motivos da ausencia do seu grupo municipal no concerto do venres, na que detallan as circunstancias en que se cursou a invitación.
Marín, 20 de febreiro de 2012

CARTA ENVIADA: Carta_Escola_de_Música[1]

Pilar Blanco asegura que non existe orzamento nin proxecto

A portavoz do BNG, Pilar Blanco, afirma que a Xunta do PP, vende fume con respecto á escola infantil de Seixo, xa que os orzamentos aprobados para o ano 2012 non contemplan ningún investimento nin para Marín nin para o Morrazo en materia de educación.
“A condición imprescindible para poder crer que a Xunta fará unha escola infantil en Seixo nesta lexislatura é contar con partida orzamentaria, e nin nos orzamentos da Xunta para o 2012 nin nos anteriores se recolle un só euro para este proxecto”, asegura Pilar Blanco.
O Plan Educa, ao que aludiu a conselleira de Benestar na súa visita a Marín, é un convenio co goberno do estado que non posúe ningunha especificación ou previsión do que se vaia a construír unha gardería en Seixo.
Debemos lembrarlle á alcaldesa e a conselleira de Benestar, que os terreos para a construción da “galescola” de Seixo, están a disposición da Xunta do PP dende o ano 2009, cando concluíron os trámites realizados polo goberno local BNG-PSOE para desafectar as vivendas de mestres do CEIP de Seixo. Durante estes anos a Xunta, a pesares das reclamacións do Concello, non fixo nada para que Seixo conte cunha escola infantil.
“As dúas galescolas coas que conta Marín construíronse durante o goberno bipartito da Xunta, que materializou os proxecto da escola infantil de San Pedro e a adaptación do centro vinculado á Casa do Mar de Marín. Dende a entrada do PP na Xunta non se creou ningunha nova praza de educación infantil nin en Marín nin no Morrazo”, asegura a portavoz do BNG.
“En canto no BNG tivemos coñecemento de que os orzamentos da Xunta non contemplaban ningunha partida orzamentaria para esta dotación, presentamos emendas a nivel do Parlamento e do Concello, que foron rexeitadas na súa totalidade polo goberno da Xunta do PP”.
“Por desgraza estamos acostumados as falsas promesas e mentiras do PP en relación a Marín, e non hai máis que remitirse ao Centro de Saúde, do cal a señora Ramallo procura non falar dende que está na alcaldía”, afirma a edil nacionalista.
Recortes nas axudas sociais
A portavoz do BNG tamén asegura que é totalmente falso que se incrementarán nun 26 % as axudas sociais da Xunta no Concello de Marín.
“ O BNG xa denunciou no seu día que durante o ano 2011 a Xunta do PP anulou ás axudas para programas de cooperación social, como talleres de memoria, escolas de pais e nais ou programas de inclusión social, reduciu á mínima expresión as axudas a nenos e nenas xitanos, reduciu nun 20% as axudas destinadas a persoas dependentes, e máis do 70% as destinadas á axuda no fogar”, asegura Pilar Blanco.
Pregunta parlamentar
Finalmente a portavoz do BNG, anuncia que obrigarán á Xunta a concretar as promesas da conselleira de Traballo con respecto á escola de Seixo, en canto a prazos e orzamentos, a través de pregunta parlamentar que presentará o deputado nacionalista Bieito Lobeira.
Marín, 17 de febreiro de 2012

O deputado do BNG, Bieito Lobeira reclamou un plan urxente para reflotar a empresa e a paralización do ERE extintivo

Santiago de Compostela, 15 de febreiro , 2012. O deputado do BNG, Bieito Lobeira formulou hoxe unha pregunta parlamentaria, en sesión plenaria, sobre as medidas adoptadas pola Consellería de Economía e Industria para defender a actividade produtiva na Factoría Naval de Marín.
O nacionalista considerou que o proceder do conselleiro de Economía e Industria como “unha máquina expendedora de cartos públicos en defensa do empresario” representa unha “irresponsabilidade” para garantir o futuro da factoría.
Neste sentido, afirmou que a actividade produtiva pódese reflotar ao igual que os postos de traballo polo que pediu que a conselleira de Traballo, Beatriz Mato, presente na Cámara galega, “rexeitara a presentación do ERE extintivo”.
Tras a resposta do conselleiro de Economía e Industria, que anunciou o apoio do Goberno galego á Factoría Naval de Marín pero sen asumir ningún compromiso ao fin de solucionar a grave situación dos seus traballadores, Lobeira reprobou esta postura e reiterou a súa reclamación de medidas concretas entre as que nomeou : “un plano de viabilidade e a inmediata paralización do ERE”.
Na súa intervención, o parlamentario nacionalista deu a benvida a unha representación de traballadores da Factoría Naval de Marín acompañada por membros do comité de empresa así como a responsable comarcal do BNG cos que mantivo unha xuntanza tralo debate parlamentario e na que reiterou o seu apoio aos traballadores afectados.
Lobeira asegurou que esta empresa ten futuro pero para iso, afirmou, é necesario parar un ERE que provocará a perda de 35 postos de traballo, “queremos compromisos concretos” reclamou o nacionalista e no caso de materializarse o plan de viabilidade, engadiu, “os traballadores deben ser consultados naquelas cuestións que serán relevantes para a empresa”.
O nacionalista lamentou que o titular e dono da empresa recibira 22 millóns de euros destinados a garantir a viabilidade e postos de traballo da factoría e tras non cumprir o seu compromiso, “non sexan esixidas responsabilidades”, -espetou-.